Sekilas tentang Nagari/ KMHA Silokek ( Tanjung Medan)

Oleh :H. Epi Radisman dt. Paduko Alam, SH

Ketua LKAAM Kabupaten Sijunjung

Sijunjung (SUMBAR).GP-  Turun Naiak ka bukik mambuik. Kayu gadang banyak babuah. Kida kanan badahan mati. Bacampua jokayu kamaik. Gagok ganta ambo manyabuik. Dek tuanku banyak nan batuah. Ninik mamak banyak nan sati.  Alim ulama nan kiramaik.

Sungai banamo batang tampo,  Aie nyo janiah tempek mandi,  Bamuaro ka batang kuantan,  Dari siko sajo ambo sapo

Tajalang indak tasalami,  Jo sambah sajo ambo tibokan.

Assalamu alaikum warahmatullohi Wabarakatuh.

Jo salam sambah dianjuang,

Samo bamohon kapado Allah,

Salawat jo salam kapado Nabi,

Salam salamat diucapkan;

Sambah lalu salam kumbali,

Kapado sagalo nan adok adang,

Indak diatok dibilang gala,

Kapaatok pambilang juo,

Nan gadang kok kurang sambah,

Nan tinggi kok kurang anjuang,

Sambah jo salam pamanuhi.

Dek duduk  manganduang niat,

Kok tagak manganduang cinto,

Siang malam rintang manyabuik,

Patang pagi tak kunjuang lupo.

Suri tagantuang nak bauleh,

Buncai tarantang nak nyo sudah,

Nagari Lah Lamo dalam Randaman

Nan tasabuik Nagari Silokek

Jikok dicaliak dipandangi

Pandang dakek ditukiakkan

Pandang jauh  dilayangkan

Bukan Silokek  bak kini

Tanjuang Medan da hulunyo

Nan tuo Tanjuang lolo

Kini banamo Silukah

Nan di tongah banamo kampuang balai tongah

Kini banamo Durian Gadang

Tak kalo maso dahulu

Koto tuo di bali tongah

Urang basawah ba duo badiak

Datuak barbanso jo datuak Palowan Bosar

Bakucikak ditangah sawah

Ojuak nan mamabaok ilang

Sogagh nan mambaok mati

Adiak (Datuak Palowan Bosar) menyentak pai kamudiak

Manampuah rimbo rayo

Manggalah biduak kamudiak

Etan manuju Tanjuang Medan

Tagarobak ditimpo upiah

Kakak (Datuak Barbanso) takajuik sakutiko

Mamanggia jo suaro kareh

Basikuai bakali-kali

Mamintak adiak baliak kailea

Kini banamo tompek Maluai

Tasingguang lobiah bak konai

Adiak ba pantang ba baliak ilie

Inyo tarui bajalan surang

Imbau pantangan kan  dijawek

Dek risau  Datuak Barbanso 

Suaro habih dek ba kuai

gilo maimbau- imbau panjang

Kini banamo Rimbo Panjang 

Dek hati batambah cameh

Kato nan indak adiak jaweh

Kakak marununuik jajak adiak

Jajak Manuju batang baye

Disinan  adiak ba sarobok

Sadangmanguih buah taye

Dek kondak lai kabuliah

Dek pintak lai ka balaku

Adiak dibujuak elok-elok

Babaliak kito ka Kampuang tuo

Nan banamo babalai tongah

Hati barek paham tatumbuak

Adiak maiikuik sakutiko

Kako mairiang dibalakang

Dek lamo lambek dijalan

Badan litak kaki lah panek

Adiak jo kako baranti sakutiko

Baranti di tapi sungai

Dicoliak angin lai salosai

Kakak batanyo batoghesi

Tompek banamo Sungai Toghe

Rupo nampak diparoman

Adiak nan indak kan babaliak ilea

Kakak baucap: kan lokek Datuak disitu ?

Dek kato indak dapek  sasui

Janji dipacik sakutiko

Disungai Toghe kito bapisah

Bapisah soko jo pusoko

Dilahia kito bajuahan

Dibatin kito manyatu

Kok pai banampak pungguang

Kakak babaliak ka Kampuang tuo Balai Tongah

Adiak bajalan manuju Tanjuang Medan

Dak lamo sukutiko

Datuak Palowan Bosar manuju Tanjuang Medan

Ndak lamo lambek dijalan

Tibo dibawah kayu batang taye

Manurun ka batang Parik

Banamo sungai batang taye

Mandaki ka kayu Palajau

Dek tinggi bukik didaki

Datuak talitak sakutiko

Basanda ka banigh kayu

Ta kalok sapanjang malam

Hari pagi  murai bakicau 

Datuak tesentak dari lalok

Mancaliak ka subarang

Nampak batu gadang  sarupo gajah

Nan banamo Taluak batu gajah

Indak lamo sukutiko

Datuak mamudiak-i  sungai gadang

Nan banamo batang kuantan

Dek lamo lambek dijalan 

Datuak baranti dakek kayu kandi

Sarupo batu tatogak 

Nan tasabuik Sungai kandi batu tatogak

Disitulah Datuak Manaruko

Mulo mancancang jo malatiah

Hinggo manjadi Taratak 

Katiko elok hari rancak

Datuak mamandang mudiak aliran batang kuantan

Nampak asok manggabubu

Datuak Bajalan manuju api hiduik

Dek jauah jalan ditampuah

Hari sanjo malam ka tibo

Datuak baranti ditapi sungai 

Mambuek pondok tampek lalok

Nan banamo Sungai Mawi

Bisuak pagi hari lah siang

Datuak bajalan manuju asok

Manyubarangi batang kuantan

Ba Ondan ba buluah kasok

Dek aie sungguah gadang

Datuak takulai di tapian pulai

Paho tasangkui di batu tajam

Kini banamo Batu Sapao

Dek sungguah datuak maminto

Pao talapeh disangkutan

Taparaok di taluak dalam

Dek sakik pao nan luko

Datuak manangih kutiko itu

Kini banamo Taluak Manggi

Dek kareh datuak manangih

Tadanga sampai ka karuman asok

Disilau dek  urang nantun

Nan bagala Datuak Rajo Mangkuto

Dek Datuak Palowan Bosar

Sakik bukan alang kapalang

Raso ka putuih pao di kaki 

Raso bapisah nyao jo badan

Dek santun Rajo Mangkuto

Digendong ka Sangkiamo

Ditawa jo sidingin

Diubek jo karak lidah

Dek Pintak lai kabalaku

Dek kondak lai kabuliah

Kok sakik lai mandapaek ubek

Kak tawa lai manyajuak-an

Tibo wakotu bungo kombang

Datuak baduo bamufakat

Mampbuek koto jo nagari

Pusako ranah nan balupak

Tabik diluhak nan Tigo,

Mulonya tanah ka dibukak

Dimulai taratak jo taruko.

Kapalo tabek jalan manurun,

Diliek di tapi parak,

Mulo Tampek kadisusun

Sapakeik dulu urang taratak

Urang koto mambuek tabek,

Dibuek mangko disusun,

Mulonyo Koto kan dibuek

Sapakaik rang taratak jo rang dusun

Bungo padi ka dihuni

Malantiang buruangkahulu

Mulo Nagari kan dihuni

Sapakaik  dahulu sagalo Penghulu

Nagari bapaga undang

Kampuang bapaga jopusako

Dibari basosok bajurami

Balabuah batapian

Ba pandam ba pakuburan

Ba korong ba kampuang

Ba rumah batanggo

Ba sawah ba ladang

Ba balai ba musajik

Inggirih ba karek kuku,

Di karek jo pisau sirawik,

Ka parawik batang tuo,

Batuang tuo ambiak ka lantai,

Nagari bakaampek suku,

Suku ba buah paruik,

Kampuang ba nan tuo,

Rumah ba tungganai.

Dek dapek kato saiyo

Datuak Palowan Bosar jo Datuak Rajo Mangkuto

Kok Bulek lah dapek digolongkan

Kok Pipiah lah dapek dilayangkan 

Ber ucap Datuak Palowan Bosar ;

Mulai dari Banda saiyo/Rayo

Hinggo ToluakTangkuan Muko-Muko

Dikuasai dek Datuak Rajo Mangkuto

Ber ucap Datuak RajoMangkuto;

Mulai dari Banda saiyo/Rayo

Hinggo Sungai Toghe

Dikuasai dek Datuak Palowan Bosar

Silokek namo nagari

Ampek suku nan di dalam

Baduo Penghulu pucuaknyo

Barampek Penghulu suku

Langkok surang manti nagari

Dibantu dek ampek urang cadiak (Manti Suku)

Cukuik jo malin tiok suku

Sarato dubalang adat

Jo tungganai sarato didalam.

Nak siang bak hari

Nan tarang bak bulan

Elok dibilang ciek-ciek

Nak sanang dalam kiro-kiro

Suku Petopang Bukik :

Datuak Rajo Mangkuto (Penghulu Pucuak)

Datuak Mangkuto Rajo (Penghulu Suku)

Datuak Monti Kayo (Monti suku)

Malin Pono (malin/Pandito)

Gindo Tan Ameh (Dubalang Adat)

Rangkayo Putiah (Tungganai Suku)

Suku Petopang Bawuah

Datuak Palowan Bosar (Penghulu Pucuak)

Datuak Malin Pandekar (Penghulu Suku)

Datuak Monti Gogar (Monti Suku)

Malin Kayo (Malin/Pandito)

Songgo Majo (Dubalang Adat)

Malin Cayo (Tungganai Suku)

Suku Melayu Gadang:

Datuak Kali Bandaro (Monti Nagari)

Datuak Penghulu Majo (Penghulu Suku)

Datuak Lelo Dirajo (Monti Suku)

Malin Karojan (Malin/Pandito)

Malin Paduko (Dubalang Adat)

Bandaro Malin (Tungganai Suku)

Suku Melayu Ketek:

Datuak Paduko Majo (Penghulu Suku)

Datuak Monti Lobiah (Monti Suku)

Pito Malin ( Malin/Pandito)

Gindo Batuah (Dubalang Adat)

Malin Parmato (Tungganai Suku)

Silokek Tanjung Medan

Bajanjang naiak batanggo turun

Naik dari janjang  bawah

Turun dari tanggo ateh

Dipimpin dek Datuak nan Baranan

Dalam suku nan Ampek

Jinih nan 23 (Duo Puluah Tigo))

Ba balai-balai Sitinjau Lawik

Ditangah ba labuah kudo

#GP | Sijunjung | 12 Oktober 2022