Bismillahirrahmanirrahim,,,,
Sijunjung (SUMBAR).GP- Dari Koto Jadi Nagari, Ado Ba tapian jo ba labuah, Asa mulonyo dari taratak. Sungguahpun Ambo tagak badiri, Dibatin duduak basimpuah,
Ampun jo maaf nan dimintak, Bagai awa pamulai kato, Sipatan rundiang pandahuluan, Salam taunjuak ka nan basamo, Kan ganti bajawek tangan.
Assalamu alaikum warahmatullohi wabarokatuh.
Gadang nan indak disabuikan gala,
Ketek nan indak di imbaukan namo,
Samo basa bak basimbuah,
Samo kanai bak mambiru,
Samo didalam himbauan ambo.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Salam salamat diucapkan;
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Pandang dakek alah ditukiakkan
Pandang jauh alah dilayangkan
Sahubuangan bakau adat pado hari nangko
Alah manuruik alua jo patuik
Alah manuruik labuah nan pasa
Artinyo bana alah balicak pinang,
Alah batapuang batu,
Alah sasuko nan sanagari,
Alah baguyang batang pinang
Badariak kalo-kalo,
Darah alah dikacau –
Dagiang alah dilapah –
Tanduak alah ditanam,
Adat alah diisi -
Limbago alah dituang”.
Kini Ninik mamak Pusek Jalo Pumpunan Ikan
Nagari Sungai Lansek,
Kecamatan Kamang Baru
Manambah ukiran hari nan bersejarah.
Karano hari ko alah diadokan baralek adat
”Kaul Adat Nagari Sungai Lansek”.
Nan banamo Adat Lamo Pusako Usang.
Hari ko alah tajadi peristiwa
Nan sangaik sakral dan bermakna
menuruik adat Minangkabau,
Nan berdasarkan Adat Basandi Syara’,
Syara’ Basandi Kitabullah,
Syara’ Mangato Adat Mamakai,
Alam Takambang Jadi Guru.
Kami yakin dan percayo
Bahwa kito nan hadir disiko, terutamo
Angku-angku ninik mamak sangat memahami,
Bahwa ditampek iko
Kito sadang berado dalam Wilayah VII Koto
Nan talatak di ikua luhak Kapalo Rantau,
Nan ba batang ka Pagaruyuang,
Nan ba tangkai ka Bukik Gombak,
Nan batampuak ka jambu lipo
Ba Bapak ka Koto Tujuah (Tanjung Ampalu),
Ba Ibu ka Sijunjung, dan
Ba Mamak ka Palangki,
Ba balai Gadang ka anam baleh koto
Batang barangan (Palangki).
Bahkan ditampek nangko tasabuik
Makam kiramaik koto tuo
Pusek Jalo Pumpunan Ikan
Bak pepatah adat kito disiko;
Sungai Lansek Pusek Jalo Pumpunan Ikan (Dt. RajoTambun Daro).
Bukik Sabalah Janjang Tuo (Dt. Rajo Ampang Limo),
Muaro Kaluai Sumuah Nan Janiah (Dt. Soru Rajo),
Kaki Bungka Lubuak Tarantang ( Dt. Rajo Bandaro),
Sayak Nan Landai/Pamedanan Dusun Tinggi (Dt. Malogun),
Tanggo Bonsu Muaro Takuang (Dt. Sati),
dan Anak Timang-Timangan di Siaur (Dt. Rajo Dubalang)
Limbak nan dari pado itu
Manuruik adat lamo pusako usang
Bakaua adat sudah tuai
Walau bak mano ragam dunia,
Baturuik juo saluruihnyo.
Patando Basyukur kapado Allah
Batarimo kasiah kapado niniak nan manaruko
Jolong mancancang jo malateh
Mulo marambah jo malamun
Tampek manabang manaruko
Bakeh batanam baro bilah
Sajak samulo bataratak
Lalu ba dusun nan baumpuak
Sampai bakorong jo bakampuang
Lah jadi koto jo nagari
Tabantang labuah jo tapian
Tadiri balai jo galanggang
Tumbuahlah Nagari Sungai Lansek nangko
Hinggo kito dapek hiduik santoso
Elok Ranahnyo Sungai Lansek
Rupo karambie tinggi-tinggi
Cando pinangnyo lingguyaran
Rupo rumpuiknyo ganti-gantian
Sawahnyo batumpak-tumpak
Ladangnyo babidang
Sawah batumpak di nan data,
Ladang babidang di nan lereng
Banda baliku turuik bukik
Tambilang basi rang tuo-tuo
Sawah lah sudah jo lantaknya
Ladang lah ba bintalak
Cancang latiah niniak moyang
Nan ba makam di tampek nangko
Nan tasobuik Makam Kiramat
Limbak nan dari pado itu
Hari batuka musim baganti
Tibo kutiko bungo kambang
Nagari Sungai lansek Pusek Jalo Pumpunan Ikan
Ikuik batandiang ditahun nangko
Pamilu Legislatif rang namokan
Dek Pintak indak kabuliah
Dek Kondak sadang indak balaku
Dek silau kilek loyang datang
Bakucak iman didado
Kuniang dek kunik lamak dek santan
Tapiliah diurang lain
Bak pantuan urang disiko :
Anak urang Sarilamak
Kapasa mambali kain
Raso kan dipilah nan diawak
Kasiah baagian ka nan lain
Idris Urang Tuo kito disiko
Karimbo Manabang Buluah
Kito manyangko lai sasalero
Dek kawan lamak aie putiah dari cindua
Nak Duo Pantun Sairiang :
Sungai Lansek Aienyo janiah
Datuak Kayo punyo tapian
Kito basamo tolong bapikia
Sasa datang iyo kamudian
Luluah bana padi dek balam
Jo dadak juo ditampisi
Ramuak bana hati didalam
Jo galak juo kito abisi
Sungguahpun babagai ragam dunia
Manuruik adat lamo pusako usang
Adat Dipakai Baru, Baju Dipakai Usang
Dimintak kapado Angku-Angku
Niniak Mamak Pamangku Adat
Khusus dinagari Sungai Lansek Nangko
Dan di nagari dalam wilayah Tujuah Koto umumnyo
Kuek-kueklah di buek, Endahlah di jonji
Walau bak mano ragam dunia,
Turuik juo saluruihnyo.
Raso jo pariso tatap dipakai
Raso dibao naik, Pariso di baok turun
Jago tali nak jan putuih
Jago dahan nak jan sokah
Jago tali pusako adat
Nan dibuek niniak moyang kito
Nan banamo adat lamo pusako usang
Umumnyo dilingkungan Tujuah Koto
Indak basuruak-an luko dikoniang
Khusus kito niniak mamak pamangku adat
Baban barek singguluang batu
Kok sariang kito alah tangga
Kok kuku kito alah dikarek
Rumah gadang kito alah tirih
Antah kamano tampek batenggang
Sungguahpun demikian,
Kok datang upek jo puji
Sangko Sitawa jo sidingin
Kok duduak buliah bakisa
Tapi dilapiak nan sahalai
Kok tagak buliah bapaliang
Tapi di tanah nan sabingka
Raso jo pariso tolong dijago
Lamak dek awak katuju dek urang
Angku/Bundo dan Hadirin nan ambo hormati
Lah babagai buah rundiangan
Awa dirunuik kapamulai
Taga dek khilaf jo khilapat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Ganggam arek pagangan taguah
Tibolah lukih ka limbago
Hancua siriah manjadi sapah
Sirahnyo tampak dibibia
Pariso maruang tubuah
Sajuak anggoto katujuahnyo
Ambacang ditangah padang
Ditingkek tangah duo tingkek
Batang pauah sadang babungo
Jikok dirantang namuahnyo panjang
Elok dikumpa nak nyo singkek
Ambiak sajo nan ka paguno
Sakian titah bakaua adat sasudah tuai
Kato sudah hinggo bak kian
Salam salamat diucapkan
Rabbana atina fiddunya hasanah
Wafilakhiratih hasanah
Wakina azabannar
Wabillah taufik wal hidayah.
Wassalamu’alaikum Warahmatullahi Wabarokatuh.
#GP | Sijunjung | 22 Oktober 2022.
Tidak ada komentar:
Posting Komentar