Bismillahirrahmanirrahim
Sijunjung (SUMBAR).GP- Palupuah batang malapari, Pucuak manimpo aka jumbai Dibaok ka Koto Tujuah, Sungguahpun ambo tagak badiri, Bukan dek ambo tau jo pandai, Dibatin duduak basimpuah
Kasah Ambun kasah biludu
Tanti batanti bajaik tapi
Baturap jo banang sirah
Alah tahampai disandaran
Mintak Ampun ambo ka panghulu
Nan salirik duduak ditapi
Nan saedaran adok katangah
Josambah ambo muliakan
Anak itiak ateh dalimo
Anak alang dalam baluka
Kaciak nan indak tapuji namo
Gadang nan indak tapuji gala
Kagunuang banyaklah kabuik
Lalu karimbo indojati
Kayu gadang banyak babuah
Bacampua jo kayu kamat
Takuik jo ganta ambo manyabuik
Panghulu banyak nan sati
Rang gadang banyak nan batuah
Tuanku banyak nan kiramaik
Bagai awa pamulai kato
Sipatan Erundiang Pendahuluan
Jaweklah salam dari ambo
Ka ganti bajawek tangan;
Assalamualaikum warahmatullahi wabarokatuh.
Subhannallah, walhamdulillah, Walaillahaillallah, Allahuakbar, Lahaulawalaquataillahi, ‘aliyulazim, Asshaduallaillahailallah, wahdahulasyarikallah, waashaduanna muhammadarrasullullah, Saw
Yang Mulia:
Angku Benny Dwifa Yuswir atau yang mewakili Pucuak Undang LKAAM Kabupaten Sijunjung, sekaligus Bupati Sijunjung, Mohon berkenan keizinan melakukan nan sepanjang adat.
Yth. Angku Ketua DPRD Kabupaten Sijunjung.
Yang Mulia
Angku Syafril Dt. Samburapi Ketua LKAAM Kecamatan Koto VII, sekaligus Ketua KAN GUGUAK, mohon berkenan keizinan melakukan nan sepanjang adat.
Yth. Camat Koto VII beserta Unsur Muspika Kecamatan Koto VII.
Yang Mulya :
Angku Datuak Bakoto Tujuah, Basambilan Koto sapuluah jo Sisawah
Yth. Angku ZAINAL Malin Wali Nagari GUGUAK dan Wali Nagari se Kecamatan Koto VII.
Yth. Panitia Sipangka Alek beserta perangkat adat di Kenegarian GUGUAK
Yth. Para rekan-rekan dari Pers baik media cetak ataupun elektronik
Sambah sujuik ka panghulu ;
sabarek bungka nan piawai,
naraco luruih main daun,
indak basibak jo basisiah,
bukan bahinggo jo babateh,
sambah kepado niniak mamak,
nan gadang basah batuah,
Nan bapucuak sabana bulek,
nan baurek sabana tunggang,
dianjuang tinggi diamba gadang,
sandi andiko dalam kampuang,
tampuak jo tangkai di nagari,
Nan bak umpamo kayu gadang manangah koto,
baurek limbago matan,
badahan cupak jo gantang,
barantiang barih balabeh,
babungo rimbun dek adat,
babuah kato nan bana,
buliah baselo diureknyo,
dapek basanda dibatangnya,
gantuangan cupak nan duo.
Limbak kapado imam katik,
bilal maulana jo tuangku,
sarato malin jo pandito nan tau jo halal dengan haram,
sarato sah dengan batal,
suluah bendang adat limbago.
Hulu balang jo ampang limo,
sarato manti pagawai adat,
parik dalam pagaran kokoh.
Salanjuiknyo kapado cadiak pandai,
nan arif bajaksano,
tau diangin nan basiru,
tau diombak nan basabuang,
saroto dahan nan kamaimpok,
ataupun rantiang kamancucuak,
tau diujuang kato sampai,
balun bakilek lah bakalam,
bulan lah sangkok tigo puluah,
takilek ikan dalam aie,
ikan takilek jalo tibo,
lah tantu jantan batinonyo.
Sarato nan mudo pambimbiang dunia,
nan capek kaki ringan tangan,
kok capek kaki indak panaruang,
kok ringan tangan tangan indak pamacah,
aso tarantang duo sudah,
hati suci bamuko janiah,
tau dimalu dengan sopan,
sarato raso jo pareso.
Taruih pulo ka bundo kanduang,
limpapeh rumah nan gadang,
sumarak didalam kampuang,
hisan dalam nagari,
kok iduik tampek banasa,
kok mati bakeh baniat,
kaunduang unduang kamadinah,
ka payuang panji kasarugo,
amban puruik aluang bunian,
urang nan duduak jo sukatan.
Angku-angku, Bundo-bundo, hadirin dan hadirat yang ambo muliakan;
Gadang nan indak disabuikan gala,
Ketek nan indak di imbaukan namo,
Samo basah bak basimbuah,
Samo kanai bak mambiru,
Samo didalam himbauan ambo.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Salam salamat diucapkan;
Dek buek bakeh bahuni,
Dek alua ndak buliah tidak,
Walau bak mano ragam dunia,
Baturuik juo saluruihnyo.
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Dek duduk manganduang niat,
Kok tagak manganduang cinto,
Siang malam rintang manyabuik,
Patang pagi tak kunjuang lupo.
Suri tagantuang nak bauleh,
Buncai tarantang nak nyo sudah,
Bangkalai lah lamo dalam randaman,
Kinilah baru kan babangkik.
Dang kato iyo baitu,
Taga dek adat maha mulia,
Jalan rayo Titian Batu,
Tumbuah sarupo iko kini.
Harapan sipohon sipangkalan,
Kito lah manjadi syahadah jo bainah,
Batagak gadang mamuntiang sako,
Dalam nagari nan basusun,
Dilingkuang kampuang nan baumpuak.
Nak luruih pajalanan adat,
Adat nan kawi syarak nan lazim,
Tibo diadat dipakai baru,
Nan kain dipakai usang.
Taga dek adat nan bapakai,
Langkah bagayuang ba balabeh,
Tukang balukih batiruan,
Kato basabuik ba katubah.
Basiang diateh tumbuah,
Mahukum ateh nan ado,
Tumbuah sarupo iko kini,
Sakatolah sipohon sipangkalan,
Bajantiak basambuang kuku,
Bakato basambuang lidah,
Mako dari ambo tarabiknyo.
Ketua LKAAM Kabupaten Sijunjung
Untuak manyampaikan niat nasar pati ambalau.
Sumpah satiah sapanjang adat,
Malewakan penghulu sako lamo,
Nan lah hadir di medan majilih,
Dihadapan kito nan basamo,
Dalam alek batagak gala
Niniak mamak nagari GUGUAK
Di ateh Rumah Gadang Malayu nangko
Rumah Gadang Datuak Paduko Sarindo
Nan Partamo, namo keteknyo Agustian
Nan manyandang Gala Soko Datuak Paduko Sarindo
Nan Basuku Malayu
Bajabatan Panghulu Suku
Nan Kaduo, Namo keteknyo Zainuddin
Nan Manyandang gala soko Incek Kayo
Dalam suku Melayu
Bajabatan Manti Suku
Nan Ka Tigo, H. Agusbar, S.Ag
Nan manyandang gala Pangulu Rajo
Nan basuku Kampai Tolang
Bajabatan Pamontian dalam suku
Nan Kaampek, Namo keteknyo Hengki
Nan bagala Kotik Kayo
Nan bajabatan Malin Pandito.
Dalam suku Kampai Tonga
Nan ka limo, Raffel namo keteknyo
Nan manyandang gala sako Malin Batuah
Nan bajabatan Manti didalam suku
Nan basuku ka Melayu
Angku-angku, Bundo-bundo, hadirin dan hadirat yang ambo muliakan;
Nagari ba Nan Tuo
Rumah Batungganai ;
Mangko dikasampatan kini juo
Alah baimbaun pulo
Tungganai Rumah atau tuo rumah,
Antaro Lain :
Partamo Namo Keteknyo Rabiul Awal
Nan bagala Pangulu Bonsu,
Tuo Rumah Datuak Paduko Sarindo,
Nan Ka Duo Bustami namo keteknyo,
Bajabatan Tuo Rumah Incek Kayo
Nan Ka Tigo, Zainal (Bilal) Namo Keteknyo
Nan bajabatan Tuo Rumah Pangulu Rajo
Nan Ka Ampek, Mardanus (Peto Kari)
Nan Bajabatan Tuo Rumah Dt. Bandaro
Nan Kalimo Mukhtar (Gindo Hijau)
Nan Bajabatan Tuo Rumah Dt. Malakewi
Nan Ka Anam, Syafriwal (sampono Kayo)
Nan Bajabatan Tuo Rumah Dt.Panghulu Kayo
Nan Ka Tujuah, Randa (Garim),
Nan Bajabatan Tuo Rumah Dt. Majo Indo.
Angku-angku, Bundo-bundo, hadirin dan hadirat yang ambo muliakan;
Baniah tampang penghulu dan ninik mamak kito,
Ba puntiang alah bahulu balun,
Kinilah baru kan lakeknyo,
Manampuah Sabab Nan Ampek
Partamo, Nan mati batungkek budi;
Panjang umua singkek permintaan
Bakicau murai, bakulik alang
Tabang arwah badan talatak
Maik tabujua pandam bakali
Takambang payuang nan sakaki
Tatanam tungkek pusako lamo
Panungkek pusako datuak
Malatuih badia pusako
Babuni tabuah sadinidin
Mandanguik aguang digantuangan
Alamat sako lah katingga
Takambang lapiak pandan putiah
Dimuko malin jo pandito
Dihadapan datuak ampek suku
Nan mamacik biang tabuak
Nan mamagang gantiang putuih
Aluang bunian simpanan adat
Dikambang kapan pambao
Dilipek kain panyaok
Antaran andan jo sumandan
Diukua mangko dikabuang
Dicabiak malin jo pandito
Mupakaik niniak dengan mamak
Mambulekaan kato sabuah kaum
Nan sapayuang sapatagak
Nan salingkuang cupak adat
Saluruih naik, saluruh turun
Dicari baniah nan sabijo
Panyandang pusako datuak
Didalam warih batali darah
Nan dilingkuang warih nasab
Bulek lah buliah digolekkan
Picaklah dapek dilayangkan
Diantakan katangah rapek
Dihadapan niniak dengan mamak
Sarato urang ampek jinih
Sadang dituah dicilakoi
Ditimbang larat jo mamfaat
Dikaji zat jo sifat
Lah sakato niniak dengan mamak
Lah kawi jonyo adat
Lah lazim jonyo sarak
Disambahkan ka datuak ampek suku
Pamacik kato kabulatan
Peti bunian didalam suku
Disandang deta panjang bakotak
Disaruangkan baju gadang balega
Dicabuik tungkek nan tatanam
Dikambang payuang nan sakaki
Diarak maik kapusaro
Diiriangkan baniah pusako datuak
Lah lambang tanah pakuburan
Tasirah tanah panggalian
Taunjam mejan nan duo
Dibaka kumayan putiah
Karatan kumayan baruih
Mangirok baun sitanggi
Dibaco do’a talakin panjang
Dituangkan aie dilabu
Sajuak manimpo tulang hitam
Maik takubua pusako tingga
Sako disandang dek nan mudo
Itu nan banamo batungkek budi
Ataupun gadang di tanah tasirah
Baitu curiang barih adat.
Kaduo, Hiduik bakarilahan ;
Bukik lah tinggi lurah lah dalam
Dayo abih badan talatak
Indak taturuik buruak baik
Putiah hati tando rela
Baban dikisa ka nan mudo
Dalam lingkuang warih nasab.
Dicari baniah nan sabijo
Dalam kaum nan sabuah
Dalam payuang nan sakaki
Dibaok rundiangan jo baiyo
Dibulekkan kato ka mufakat
Lalu dituah dicilakoi
Diliek simpanan adat
Kapado Datuak ampek suku
Kabek sabalik buhua sintak
Lungga ba pantang tangga
Arek bapantang ungkai
Tibo nan punyo larak sajo
Ditapuang bareh dilasuang
Dipancang galanggang rami
Bakacau darah balapah dagiang
Tatagak marawa basa
Dilakekkan banta sarogo
Batirai balangik langik
Tadendeng tabia laie
Dilakekkan pati ambalau
Dihadiakan baso jo panghulu
Tagantuang aguang jo momongan
Babunyi telempong ganok ganjie
Tatanam tombak jangguik jonggi
Batapuang pua dirimbo
Balicak pinang dipadang
Kabasaran adat sajo galo
Lamah batueh condong batungkek
Nak sanang sako diinggiran
Pusako lamo barubah tidak
Miliak tapacik di nan punyo
Baitu lilih cupak adat.
Katigo, Mangambang nan balipek :
Tuah diateh nan sakato
Cilako kato basilang
Pakaian adat sajo galo
Jadi rajo sakato alam
Jadi Panghulu sakato kaum
Indak dapek kato sapakat
Pado maso batungkek budi
Barabuik warih nasabnyo
Pusako talipek hanyo lai
Disimpan datuak ampek suku
Talipek dalam peti bunian
Samantaro kusuik nak salasai
Talatak adat nan kawi
Talipek pusako datuak
Bilolah dapek kato sapakat
Dalam kaum warih nasab
Buleklah buliah digolongkan
Picak lah dapek dilayangkan
Diantakan kadatuak ampek suku
Manjapuik pusako nan talipek
Nan tasimpan dipeti bunian
Datuak ampek suku mamacik kuncinyo
Kalau sasuai latak jo tariak
Kunci tabukak sandirinyo
Kabek sabalik buhua sintak
Tibo nan punyo larak sajo
Pusako lah tibo diinggiran
Payuang takambang ditampeknyo
Banamo mangambang nan balipek
Kaampek, Mambangkik batang tarandam;
Dek senteang kamari sayuik
Bukan sayuik ameh jo perak
Hanyo kurang nyao jo badan
Indak bapunyo laki-laki
Bak biduak kurang pandayuang
Lamo bangkalai dalam randaman
Pusako tagantuang tinggi
Tasangkuik ditiang panjang
Tasimpan dalam aluang bunian
Dipacik datuak ampek suku
Talatak dibilak dalam
Tasimpan sarato jo adatnyo
Dek ujuik sungguah mamintak
Takadia manyudahi
Dek lamo musin bakisa
Lahialah anak laki-laki
Sadang lai tareh ka mambangun
Sifatnyo adat ka bapakai
Tarabik cayo timua jati
Ambun satitiak dari langik
Sampailah saat kutikonyo
Dijapuik taruahan adat
Dibukak aluang bunian
Simpanan datuak ampek suku
Dijapuik sarato jo adatnyo
Dipancang galanggang rami
Aguang jo momongan talun batalun
Lamo nan tujuah hari panuah
Tatagak medan marawa
Tagantuang tirai maniak manikam
Tabie laie tadendeng nyato
Dikacau darah dilapah dagiang
Adat nan kawi dipakai baru
Kain dibadan dipakai usang
Bangunlah pusako ditampeknyo.
Angku-angku, Bundo-bundo, hadirin dan hadirat yang ambo muliakan;
Itulah Sabab jalan nan ampek
Manuruik barih cupak adat
Warih nan sajak dahulunyo
Jalan rayo titian batu
Limbak nan dari pado itu
Manuruik kato pusako
Jalan nan pasa dek batampauh
Kaji nan lanca dek baulang
Kalau manuntuik ateh nan ado
Manimbang ateh nan patuik
Basiang ateh tumbuah
Tumbuah sarupo iko kini
Lah asah siang bak hari
Lah nyato tarang babulan
Mamang adat jo limbago
Mamakai adat nan kawi
Manuruik syarak nan lazim
Didalam cupak nan buatan
Iyolah Adat jo Ibadat
Tigo jo syarak nan lazim
Ampek jo adat nan kawi
Limo jo undang nan balukih
Anam jo cupak nan balupak
Didalam warih nan bajawek
Adopun undang nan balupak
Tiok suatu nan tumbuah
Maniliak kito ka asanyo
Baniah lah sudah dapek kasai
Lah balimau mandi sunat
Mandi luah mandilah kalam
Manuruik adat basandi syarak
Didalam barih cupak adat
Kinilah duduak ditampeknyo
Lah mamakai lahia jo batin
Batin basiram kalimah Allah
Dalam hakikat jo makrifat
Nabi kito nabi Muhammad
Ikutan penghulu di Minangkabau
Mambao sifat Rasullah
Luruih bana basifat sabar
Didalam baligh nan barakal
Tawakal kapado tuhan nan satu
Laki-laki zatnyo baik
Kayo pado akal dan budi
Adil pado tampeknyo
Arif dan bijaksano pakaian diri
Tau dibayang kato sampai
Tablig manyampaikan suatu nan baik
Pamurah pado tampeknyo
Barilmu pada undang dan hukum
Ataupun adat jo pusako
Tulus bakato bana
Bapadang lapang didalam sabar
Kok datang upek jo gunjiang
Sangko sitawa jo sidingin
Kok tibo puji jo sanjuang
Kambalikan kapado Allah
Alah pulo mamakai caro lahia
Kain baju pandindiang miang
Kabasaran adat maha mulia
Pakaian nan bukan sumbarang pakai
Ado badalia maknanyo
Lah kito liek kito pandangi
Dihadapan kito nan basamo
Lah lakek deta panjang bakotak
Atau basaluak batiak batimba
Bayangan isi dalam kulik
Panjang tak dapek diukua
Leba tak dapek dibilai
Salilik lingkaran kaniang
Ikek satuang jo kapalo
Tiok katuak baundang-undang
Tiok karuik budi marangkak
Tabuak dek paham tiok lipek
Lebanyo pandindiang kampuang
Pandukuang anak kamanakan
Hamparan dirumah tanggo
Bajanjang naik batanggo turun
Paraok gonjong nan ampek
Palingka atok bakolam
Dihalaman manjadi payuang panji
Panudungi urang korong kampuang
Sarikat warih mandirikan
Tampek bataduah hari hujan
Dek sapayuang sapatagak
Nan salingkuang cupak adat
Sarato nan dibawah payuang
Panjangnyo palilik korong
Palingka nan sabuah kaum
Jikok dikambang saleba alam
Bajunyo godang biludu lokan
Langan tasenseang tak pambangih
Pangipeh angek nak dingin
Pahambek gabiak nak tanang
Siba batanti timba baliak
Tatutuik jahik pangka langan
Mambayangkan buhua tak mambuku
Pandai mauleh tak mangasan
Lauik ditampuah tak barombak
Padang ditampuah tak barangin
Budi haluih paham bakunci
Sipatnyo pantang kaajukan
Langan balilik kiri kanan
Baminsie makau kaemasan
Gadang barapik jo nan ketek
Alamat rang gadang bapangiriang
Tagak barapuang jo aturan
Adat limbago nan mangapuang
Baukua jambo jo jangkau
Unjuak baagak bahinggokan
Murah jo maha mambatasi
Martabat nan anam bapakaikan
Lihia nan lapeh tak bakatuak
Babalah hampia ka dado
Manyatokan alamnyo leba
Bapadang lapang balawik laweh
Buminyo laweh tak bahinggo
Gunuangnyo tak runtuah dek kabuik
Lauiknyo tak karuah dek ikan
Rang gadang martabat saba
Tagangnyo bajelo-jelo
Kanduanyo badantiang-dantiang
Hati lapang paham salasai
Cukuik syarat kato jorundiangan
Sarawanyo cindai pucuak rabuang
Guntiang banamo guntiang aceh
Jahik nan caro Sialahan
Sarawa hitam guntiang ampek
Kaki gadang baukuran
Atau galombang tapak itiak
Panuruik alua nan patuik
Panampuah jalan nan pasa
Kadalam korong jo kampuang
Masuak kakoto jo nagari
Langkah salasai baukuran
Martabat nan anam mambatasi
Murah jo maha ditampeknyo
Bajalan surang tak dahulu
Bajalan baduo tak ditangah
Himat jimat labiah dahulu
Martabat nan kaanam haram kok lengah
Manahan sudi jo siasek
Kuma bapantang kalahiran
Kok mangganggam nan sabinjek
Pahamnyo jago jo bicaro
Caweknyo suto bajumbai alai
Saeto pucuak rabuangnyo
Saeto jumbai alainyo
Jambua nan tangah tigo tampok
Palilik anak kamanakan
Panjarek aka budinyo
Pamauik pusako datuak
Nak kokoh lua jo dalam
Nan jinak nak makin tanang
Nan lia nak jan tabang jauh
Kabek sabalik babuhua sintak
Kokoh tak dapek diungkai
Guyah bapantang tangga
Lungga bak dukuah dilihia
Dibukak mangko kaungkai
Jo rundiang mangko katangga
Kato mupakat paungkainyo
Kapalonyo pandiang parisai pusek
Bamato intan jo podi
Lihianyo kapalo cawek
Batin panangka karajo setan
Tampek sanjato bakeh basanda
Banamo karih kabasaran
Sampiang sabidang ateh lutuik
Kayo jo misikin alamatnyo
Ado batampek kaduonyo
Luruih senteang tak buliah dalam
Luruih dalam tak dapek senteang
Karajo hati kasamonyo
Mungkin jo patuik baukuran
Tanahnyo merah bacukia makau
Tando barani di nan bana
Ulemu bak bintang bataburan
Sumarak katangah koto
Mancayo masuak nagari
Kain kaciak kain disandang
Kain cindai kain bacukia
Pahapuih paluah dikaniang
Pambungkuih tingga bajapuik
Pangampungan taicia babinjek
Kato dahulu batapati
Kato kudian nan bacari
Salanjuiknyo karih kabasaran
Sampiang jo cawek nan tampeknyo
Sisiknyo tanam tabukan
Lataknyo condong kakida
Dikesong mako dicabuik
Gembonyo tumpuan puntiang
Tunangan hulu kayu kamat
Kokoh tarago dek ambalau
Guyahnyo bapantang tangga
Bengkoknyo tangah tigo patah
Tapi liruih makanan banang
Bantuak dimakan siku-siku
Bamato baliak batimba
Pantang balampeh kaasahan
Tajam bak rago bagabuih
Mamutuih rambuik dahambuihkan
Tapi bapantang malukoi
Kaparauik lahia jo batin
Pangikih miang dikampuang
Panarah bungkuak sajangka
Ipuah nan turun dari langik
Biso bapantang katawaran
Jajak ditikam mati juo
Disaruang karih bamain
Digalanggang pandeka mati
Lahia batin pamaga diri
Patah lidah tampek kalah
Patah karih bakeh mati
Pamenannyo tungkek kayu kamat
Ujuang tanduak kapalo perak
Panungkek adat jo pusako
Barih tatagak nak jan condong
Sako nak kokoh diinggiran
Ingek sabalun kanai
Gantang nak tagak jo lanjuangnyo
Baitu martabat pakaian panghulu
Arti makna caro batin
Dilahia kato nan basusun
Dibatin hakikat jo ma’rifat
Kok tapakai nan bak kian
Samporono adat jo sifat
Banamo panghulu mukmin
Kalau lah kulik manganduang aie
Lapuak lalu kapanguba
Binaso tareh nan didalam
Jikok panghulu bapaham caie
Jadi sampik alam nan leba
Lahia batin dunia tanggalam
Namun baato lah tu kini
Nak asah adat bapakai
Nak lakek pati ambalau
Kato dibari bakatubah
Tarabiklah cahayo nan salapan
Nan ampek jatuah kalangik
Aso bulan jo mantari
Tigo timua ampek salatan
Diateh awang nan gumawang
Tampek tagantuang tiang arasy
Nan ampek jatuah kabumi
Tadiri adat jo sarak
Rumah gadang, Lumbuang bapereang
Tampek hiduik kadipakai
Bakeh mati kaditompang
Manuruik barih balabeh adat
Nan rajo kulipah Allah
Nan penghulu kulipah Nabi
Nabi kito nabi Muhammad
Ikutan panghulu di Minangkabau
Padoman kito kitabullah :
A’uzubillahiminassyaithanirrajim
Bismillahhirrahmanirrahim
Alhamdulilahirrabil’alamin
Wassalatuwassala asyrafil
Ambiyaa-i walmursalin
W’ala alihi washahbihi ajma’iin
Wayakmuruna bil makruf
Wayanhauna anil mungkar
Wayussyarri’una fil khairati
Manyuruah babuek baik
Managah babuek jahek
Basugiro kapado kebajikan
Wajib bagi datuak sagalo panghulu
Niniak mamak dialam minangkabau
Wa izaa hakamtu bainannasi
Antahkumu bil adli
Apobilo menghukum engkau diantaro duo manusia
Mako hukumlah dengan adil.
Dek sariak natikan tabang
Kapuhun sambia kamudiak
Dibaok pulang sibatiah-batiah
Dilipek lalu diladuangkan
Balaia tantang pulau batu
Tanam biluluak ateh tanjuang
Jikok kaciak dinantikan gadang
Gadang mahukum kok tak adia
Bakato kok dilua bana
Lakeklah rantai kini-kini
Dimakan sumpah Parapatiah
Kanai dek kutuak Katumangguangan
Kok tak basuo nan sado itu
Nan sakadok sikati limo
Timbangan naraco bungka piawai
Kok sampai sakatian kiri
Sumpah malakek maso itu
Arek-arek mamagang buek
Taguah-taguah mamagang satiah
Gantilau mudiak bubuangan
Singgah manyasok bungo marak
Sapantun kasau jo bubuangan
Putuih pangarang mangko rarak
Kawi adat basumpah satiah
Lazim syarak bakalamullah
Sado nan tasabuik namo
Baimbaukan gala dimaso hari nan cako
Jabatan adat dinagari
Mintak dibao sahilia samudiak
Baok sautang sapiutang
Nak samo dianjuang tinggi
Nak samo diamba gadang
Baok bakampuang baikorah
Balingkuang jo sumpah satiah
Samo manapiak mato karih
Basumpah bakalamullah
Kaateh indak bapucuak
Kabawah indak baurek
Ditangah dilariak kumbang
Bak karakok tumbuh dibatu
Hiduik sagan mati tak namuah
Kalau barubah salah satu
Habih dimakan biso kawi
Baitu buek nan lah arek
Sajak nan dari niniek muyang
Warih nan samo kito jawek
Akhia kato kasudahan rundiang
Kinilah samo kito anjuang
Penghulu pangkat adat
Kok gadang lah diamba jo martabat
Tinggilah dianjuang jo kudarat
Lah tabendang kalangik tujuah pangkat
Curai paparan kato adat
Ambacang ditangah padang
Ditingkek tangah duo tingkek
Dahan Pauah sadang babungo
Jikok dirantang amuahnyo panjang
Elok dikumpak naknyo singkeh
Ambiak sajo nan kapaguno
Lah babagai buah rundiangan
Awa dirunuik kapamulai
Taga dek khilaf jo khilafat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Ganggam arek pagang lah taguah
Tibolah lukih ka limbago
Hancua siriah manjadi sapah
Sirahnyo tampak dibibia
Pariso maruang tubuah
Sajuak anggoto katujuahnyo
Kalilawa dipulau rimbang
Anak ruso mati tadabiah
Kok gawa tolong ditimbang
Kok doso ampun nan labiah
Sakian titah adat nobat
Kato sudahi hinggo bak kian
Salam salamat diucapkan
Rabbana atina fidunya hasanah
Wafilakhiratih hasanah
Wakina azabannar
Wabillah taufik wal hidayah
Wassalamu’alaikum Warahmatullahi Wabarokatuh.
H. Epi Radisman Dt. Paduko Alam, SH
#GP | Sijunjung | 21 Oktober 2021
Tidak ada komentar:
Posting Komentar