Adat Salingka Nagari Tanjung Gadang Kecamatan Tanjung Gadang.

 

Oleh: H. Epi Radisman Dt.Paduko Alam,SH  

Ketua LKAAM Kabupaten Sijunjung

Bismillahirrahmanirrahim,

Sijunjung (SUMBAR).GP-  Sungai banamo batang tampo. Aie nyo janiah tempek mandi.Bamuaro ka batang kuantan. Dari siko sajo ambo sapo. Tajalang indak tasalami. Jo sambah sajo ambo tibokan.

Dari Koto Jadi Nagari,  Ado Batapian Jo Balabuah.  Asa Mulonyo Dari Taratak

Sungguahpun Ambo Tagak Badiri. Dibatin Duduak Basimpuah,  Ampun Jo Maaf Nan di mintak,  Bagai awa pamulai kato, Sipatan rundiang pandahuluan,  Salam taunjuak ka nan basamo,  Kan ganti bajawek tangan

Assalamu’alaikum Warahmatullahi wabarokatuh.

Yang Mulia; 

Angku Benny Dwipa Yuswir, S.STP, MSi Pucuak Undang LKAAM Kabupaten Sijunjung, sekaligus Bupati Sijunjung, beserta rombongan, Mohon berkenan  keizinan melakukan nan sepanjang adat.

Angku  Sutan Riska Daulat Yang Dipertuan  Sri Maharaja Diraja, SE (Raja Koto Besar,  Ketum APKASI (Asosiasi Pemerintah Kiabupaten Seluruh Indonesia) dan Bupati Dharmasraya,

Angku Bambang Irawan  Ketua DPRD Kabupaten Sijunjung beserta Anggota

Yang Mulia; 

Angku  Yulizar Efendi  Dt. Penghulu Rajo  Ketua LKAAM Kecamatan Tanjung Gadang,  Mohon berkenan keizinan melakukan nan sepanjang adat.

Angku Erfan Emil Pucuk Undang LKAAM Kecamatan, sekaligus  Camat Tanjung Gadang berserta Forkopincam Kecamatn Tanjung Gadang

Yang  Mulia Angku AT Dt. Bijo Dirajo  Ketua KAN  Tanjung Gadang dan Angku Prima Randu HS, SPd Wali Nagari Tanjung Gadang

Panitia Sipangka Alek beserta perangkat adat di Kenegarian Tanjung Gadang

Para rekan-rekan dari Pers baik media cetak ataupun elektronik 

Angku-Angku Ninik mamak  ...., alim ulama......, cadiak Pandai.., Bundo  kanduang Limpapeh Rumah Nan Gadang...., Hadirin  dan hadirat yang berbahagia. 

Indak diatok dibilang gala,

Kapaatok pambilang juo,

Nan gadang kok kurang sambah,

Nan tinggi kok kurang anjuang,

Sambah jo salam pamanuhi.

Dek duduk  manganduang niat,

Kok tagak manganduang cinto,

Siang malam rintang manyabuik,

Patang pagi tak kunjuang lupo.

Suri tagantuang nak bauleh,

Buncai tarantang nak nyo sudah,

Bakaua  Adat sasudah tuai,

Kinilah baru kan bakakok.

Manuruik Adat nan kawi

Syarak nan lazin

Adat Basandi Syara’,

Syara’ Basandi Kitabullah

Syara’ Mangato Adat Mamakai

Alam Takambang Jadi Guru

Jikok dicaliak dipandangi

Pandang dakeh alah ditukiaan

Pandang jauah alah dilayangkan

Sahubungan jo Bakua adat di Nagari Tanjung Gadang nangko;

Alah manuruik alua jo patuik

Alah manuruik labuah nan pasa

Artinyo bana ; “Alah balicak pinang,

Alah batapuang batu,

Alah sasuko nan sanagari,

Alah baguyang batang pinang

Badariak kalo-kalo,

Darah alah dikacau –

Dagiang alah dilapah –

Tanduak alah ditanam,

Adat alah di isi

Limbago alah dituang”.

Angku/Bundo dan Hadirin nan ambo hormati !

Kini Nagari Tanjung Gadang, Kecamatan Tanjung Gadang 

Alah  menambah hari nan bersejarah.

Karano  hari ko alah diadokan 

Baralek Bakaua Adat tahun  2022 M

Hari Isnin 21 Rabiul Awal 1444 H

Di Tompat Perkaulan Balai Adat Koto Ranah 

Tanjung Gadang Lahianyo Hari Senin

Pado Abad nan ka XIII (Tigo  Baleh) 1286 M

Tapeknyo 12 Rabiul Awal 707  H

Nan tiok tahun diparingati

Nan tasobuik Hari Katompat

Untuak mambayie kaua sasudah tuai

Syukuran kato rang kini

Artinyo Nagari Tanjuang Gadang,

Hariko adolah ulang tahun ke- 737.

Kami yakin dan picayo

Bahwasonyo kito nan hadir disiko

Tarutamo”angku-angku ninik mamak

Nan gadang basa batuah

Sangaik memahami.

Nan ado di nagari Tanjung Gadang nangko

Manuruik  adat lamo Pusako Usang

Dalam pamakaian Adat Salingka Nagari,

Nan dipimpinan dek Datuak Penghulu Rajo (Melayu).

Sarato Urang Tuo di Nagari

Jo Datuak Nan Sapuluah

Adopun Urang Tuo  di Nagari adolah :

Datuak Sinaro Nan Putiah (Piliang)

Nan bajabatan  Sondi Padek di Nagari

Datuak Paduko Rajo (Melayu)

Nan Bajabatan Tiang Panjang di Nagari

Datuak Bijo Dirajo ( Petopang) 

Nan bajabatan Dubalang dan Pagaran Kokoh di Nagari

Sadangkan Datuak Nan Sapuluah  itu adolah;

Datuak Panghulu Rajo (Penghulu Suku Melayu dan Rajo di Nagari)

Datuak Paduko Rajo (Urang tuo suku  Melayu dan Tiang Panjang di Nagari)

Datuak Panghulu Sati (Penghulu  suku Caniago), 

Datuak Bandaro Sati (urang tuo didalam suku Caniago)

Datuak Bagindo Khatib ( Penghulu suku Piliang),

Datuak Sinaro Nan Putiah(urang tuo suku Piliang dan Sondi Padek di Nagari)

Datuak Rajo Alam (Penghulu suku Petopang),

Datuak Panghulu Kayo (urang tuo dalam suku Petopang)

Dan Datuak Panghulu Batuah (Penghulu Suku Piliang Limo)

Datuak Tan Mandaro (urang Tuo dalam Suku Piliang Limo)

Bukan Tanjuang Gadang  bak kini, 

Bukik Tan Pogang dahulunyo

Limo  suku nan di dalam

Nan tasabuik Datuak Sapuluah

Urang Tuo Di Nagari jo Suku

Balimo Penghulu suku

Dibantu dek Limo  urang cadiak (Manti Suku)

Cukuik jo malin tiok suku

Sarato dubalang adat

Jo Jini nan ampek  sarato didalam.

Ba balai-balai Sitinjau Lawik

Ditangah ba labuah kudo

Nak siang bak hari

Nan tarang bak bulan

Elok dibilang ciek-ciek

Nak sanang dalam kiro-kiro

Suku Melayu :

Datuak Paduko Rajo (Urang Tuo di Nagari nan bajabatan Tiang Panjang)

Datuak Penghulu Rajo (Penghulu Suku)

Muncak St Rajo Diateh  (Monti Suku)

Malin Paduko (Malin Suku)

Rajo Intan  (Dubalang Suku)

Suku Piliang:

Datuak Sinaro Nan Putiah(Urang Tuo di Nagari nan bajabatan Sondi Padek)

Datuak Bagindo Khatib (Penghulu Suku)

Rajo Mudo (Monti Suku)

Pokiah Sati ( Malin/Pandito)

Pito Alam (Dubalang Adat)

Suku Caniago :

Datuak Penghulu Sati  (Penghulu Suku)

Datuak Bandaro Sati  (Urang Tuo Suku)

Malin Sutan  (Monti suku)

Palito Malin (malin suku)

Mandaro Alam  (Dubalang Suku)

Suku Petopang :

Datuak Bijo Dirajo (Dubalang dan Pagaran Kokoh Dinagari)

Datuak Rajo Alam  Penghulu Suku)

Datuak Panghulu Kayo (Urang Tuo Suku )

Duniah Alam  (Monti Suku)

Malin Mancayo (Malin/Pandito)

Suku Piliang Limo:

Datuak Panghulu Batuah  (Penghulu Suku)

Dt. Tan Mandaro (Urang Tuo Suku)

Bagindo Malano  (Monti Suku)

Mandaro  Malin ( Malin Suku )

Bujang Kayo  (Dubalang Suku)

Tanjung Gadang Koto Nan Ampek 

Ba balai tanah di Kapalo Koto (Aie Angek)

Bakabasaran; Aie Angek,  Congkiang (Timbulun), 

Solok (Solok Amba) dan Tanjuang Gadang 

Nan barajo ka Datuak Sati.

                                      

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                            

Angku/ bundo hadirin nan ambo muliakan;

Limbak nan dari pado itu

Manuruik adat lamo pusako usang

Bakaua adat sudah tuai

Walau bak mano ragam dunia,

Baturuik juo saluruihnyo.

Patando Basyukur kapado Allah

Batarimo kasiah kapado niniak nan manaruko

Jolong mancancang jo malateh

Mulo marambah jo malamun

Tampek manabang manaruko

Bakeh batanam baro bilah

Sajak samulo bataratak

Lalu ba dusun nan baumpuak

Sampai bakorong jo bakampuang

Lah jadi koto jo nagari

Tabantang labuah jo tapian

Tadiri balai jo galanggang

Tumbuahlah nagari Tanjung Gadang  nangko

Hinggo kito dapek hiduik santoso

Angku/Bundo dan Hadirin nan ambo hormati,

Sungguahpun  babagai ragam dunia 

Manuruik adat lamo pusako usang

Adat Dipakai Baru, Baju Dipakai Usang

Dimintak kapado Angku-Angku 

Niniak Mamak Pamangku Adat

Mamak Rumah jo Tungganai

Bundo Kanduang Limpapeh rumah nan gadang

Kamanakan, sumando jo cucuang kamanakan

Handai tolan, ayam bainduak siriah bajunjuangan

Khusus dinagari Tanjung Gadang  Nangko

Kuek-kueklah di buek,

Endahlah di jonji

Walau bak mano ragam dunia,

Turuik juo saluruihnyo.

Raso jo pariso tatap dipakai

Raso dibao naik, Pariso di baok turun

Jago tali nak jan putuih

Jago dahan nak jan sokah

Jago tali pusako adat

Nan dibuek niniak moyang kito

Nan banamo adat lamo pusako usang

Kaba elok baimbauan

Kaba buruak bahamburan

Indak basuruak-an luko dikoniang

Khusus kito niniak mamak pamangku adat

Baban barek singguluang batu

Kok sariang kito alah tangga

Kok kuku kito alah dikarek

Rumah gadang kito alah tirih

Antah kamano tampek batenggang

Sungguahpun demikian,

Kok datang upek jo puji

Sangko Sitawa jo sidingin

Kok duduak buliah bakisa

Tapi dilapiak nan sahalai

Kok tagak buliah bapaliang

Tapi di tanah nan sabingka

Raso jo pariso tolong dijago

Lamak dek awak katuju dek urang

Ambacang ditangah padang

Ditingkek tangah duo tingkek

Dahan Pauah sadang babungo

Jikok dirantang amuahnyo panjang

Elok dikumpa naknyo singkek

Ambiak sajo nan kapaguno

Lah babagai buah rundiangan

Awa dirunuik kapamulai

Taga dek khilaf jo khilafat

Kalau batamu silik sumbiang

Kok ratak tolonglah simpai

Kalilawa dipulau rimbang

Anak ruso mati tadabiah

Kok gawa tolong ditimbang

Kok doso ampun nan labiah

Sakian titah bakaua adat sasudah tuai

Kato sudahi hinggo bak kian

Salam salamat diucapkan

Rabbana atina fidunya hasanah

Wafilakhiratih hasanah

Wakina azabannar

Wabillah taufik wal hidayah

Wassalamu’alaikum Warahmatullahi wabarokatuh 

#GP | Sijunjung | 17 Oktober 2022.