Sekilas tentang Nagari Tamparungo Kecamatan Sumpur Kudus.
Disampaikan oleh:
Sijunjung (SUMBAR).GP- Naik turun ka Bukik Mambuik, Kakida jalan ka Sisawah, Babelok Taruih ka Manganti, Singgah Sabanta di pasa jumaik. Gagok Ambo manyabuik, Dek tuanku banyak nan batuah, Niniak Mamak banyak nan sati, Alim ulama nan kiramaik.
Sungai banamo batang Tampo, Aie nyo janiah tampek mandi, Bamuaro ka batang Kuantan. Dari Siko sajo Ambo sapo, Tajalang indak tasalami, Jo sambah sajo ambo tibokan.
Assalamualaikum warahmatullahi wabarokatuh
Jo salam sambah dianjuang,
Samo bamohon kapado Allah,
Salawat Jo salam kapado nabi,
Salam salamat diucapkan.
Jikok dicaliak dipandangi,
Pandangan dakek ditukiakkan,
Pandangan jauah dilayangkan,
Tantang Nagari Tamparungo,
Bukan Tamparungo nan bak kini,
Tampuruangnyo dahulunyo,
Nan Ba ibu ka Tanjuang Bonai Aua,
Nan Bapak KA Sumpu Kuduih,
Sasawah anak jajatan,
Manganti Jalujua Bosi,
Hinggo Paru malintang mudiak,
Silukah, Durian Gadang Jo Silokek ado didalam lingkuang,
Hinggo Sikunci awer Saiyo,
Tamparungo Namo nagari,
Nan tasabuik anak panuruik,
Di paliharo dek DATUAK nan duo,
Datuak Rajo Palowan nan dihaluan,
Datuak Anta Rajo nan dikamudi.
Dan Dipacik arek dek Datuak Ampek suku:
Datuak Gampo Alam lantak Nan dak guyah,
Datuak Sampono Marajo Kandang Adat,
Datuak Marajo Indo camin Nan tak kabua,
Dan Datuak Marajo pagaran adat.
Langkok dipaga Jo Datuak Nan salapan:
Datuak Malin Panghulu paga nagari,
Datuak Kali Bandaro paga nagari,
Datuak Paduko paga nagari,
Dan Datuak Mangkuto Sinaro juo paga nagari.
Jikok disimak asal-usul,
TANJUANG LABUAH
Dibuek dek Malin Batuah,
Baduo Jo Datuak Marajo,
Dek hari katiko elok,
Bandaro Hitam manurun dari Bukik Tapuih,
Malin Kociak tibo dari Simaru (Guguak Koto)
Batomu rombongan di Patomuan Aie,
Batang Sariau jo batang Pongkahan,
Basuo Tampuruang Padi,
Patando lah ado urang dihulu,
Nan tasabuik "TAMPURUANGNYO"
Kini banamo Tamparungo.
Nak siang bak hari,
Nak tarang nan bak bulan,
Elok dibilang ciek-ciek.
Nak sanang dalam kiro-kiro:
Nagari Tamparungo mampunyai 12 Suku, dan 50 Jinih Niniak Mamak :
1. Suku Piliang:
* Datuak Gampo Alam (Penghulu Nagari)
* Intan Kayo (Monti suku)
* Kotik Rajo (Malin suku)
* Peto Rajo (Dubalang suku)
2. Suku Kampai:
* Datuak Sampono Marajo (Monti Nagari)
* Ompang Limo (Monti suku)
* Sapono Malin (Malin suku),
* Intan Omeh (Dubalang suku)
3. Suku Caniago :
* Datuak Marajo Indo (Malin Nagari)
* Malin Panjang (Monti suku)
* Kotik Bagindo Ali (Malin suku)
* Malin Parmato (Dubalang suku)
4. Suku Patopang:
* Datuak Marajo (Dubalang Nagari)
* Kotik Palowan (Monti suku)
* Malin Omeh (Malin suku)
* Peto Jalelo (Dubalang suku)
5. Suku Domo:
* Datuak Malin Panghulu (Paga Nagari)
* Nakhodo Pandai (Monti suku)
* Peto Homok (Malin suku)
* Mantari Gilo (Dubalang suku)
6. Suku Loncai Ilie:
* Datuak Kali Bandaro (Paga Nagari)
* Tampono (Monti suku)
* Peto Kari (Malin suku)
* Rajo Nan Putiah (Dubalang suku)
7. Suku Piliang Ateh:
* Datuak Paduko (Paga Nagari)
* Malin Putiah (Monti suku)
* Malin Batuah (Malin suku)
* Peto Mosu (Dubalang suku)
8. Suku Caniago :
* Datuak Mangkuto Sinaro (Paga Nagari)
* Kotik Sampono (Malin suku)
* Sutan Dilangik (Dubalang suku)
* Panome (Dubalang)
9. Suku Melayu:
* Datuak Anta Rajo (Kamudi)
* Kuncang (Tungkatan)
* Sipak Rajo (Monti suku)
* Rajo Kotik (Malin suku)
* Bandaro Hitam (Dubalang suku)
10. Suku Loncai Mudiak:
* Datuak Rajo Palowan (Haluan)
* Panghulu Kayo (Tungkatan)
* Paduko Rajo (Monti suku)
* Peto Mudo (Malin suku)
* Bagindo Rajo (Dubalang suku)
* Malano (pangulu rumah),
* Malin Majo (pangulu rumah nan limo)
11 Suku Bendang Melayu :
* Songgo Marajo (Panghulu Suduik)
* Sampono Lelo (Monti suku)
* Peto Malin (Malin suku)
* Mantari Gagah (Dubalang suku)
12. Suku Bendang Domo:
* Palowan Garang (Penghulu Suduik)
* Panji Alam (Malin suku)
Tamparungo Adat Lamo Pusako Usang,
Ba pacik baganggam taguah,
Siang ba patungkek,
Malam ba pakalang,
Niniak Mamak pemangku Adat Tamparungo;
Mampunyoi Soko jo Pusoko
Ka bukik balantak la cuik,
Ka lurah baguliang aie,
Mulai dari tanah nan sabingka,
Aie nan satitiak,
Rumpuik nan sahalai,
Capo nan sabatang,
Kaateh ta ambun jantan,
Ka bawah takasiak bulan,
Panghulu nan punyo pusoko ulayat,
Tamasuak ka rumah nan bagonjong,
Ka musajik nan baquba,
Babungo adat jo sara',
Kok disigok subalah manyubalah,
Ka Manganti ba Cubadak randah,
Ka Sisawah Tanah Kupik,
Ka awua Saiyo Sungai Pulang,
Ka Koto Panjang ba Bukik Kopu,
Ka Lubuak Jantan ba Parik Sangki,
Ka Silantai ba Bukik Pincalak,
Dan Ka Sumpu Kuduih ba Lantiak Aue Kuniang.
Tamparungo nan ba Balai-Balai Labuah Kudo,
Nan ba kalarasan Koto Piliang,
Bajanjang naik,
Batanggo turun,
Baitu adat Datuak Katumangguangan
Nan ditarumo sampai kini,
Sisiak ndak usah gadang dari ikan,
Dahan ndak buliah tinggi dari pucuak.
Ambacang ditangah Padang,
Ditingkek tangah duo tingkek,
Daun pawuah sadang babungo,
Kok dirantang amuahnyo panjang,
Elok dikumpai nak nyo singkek,
Ambiak sajo nan ka paguno.
Tambilang di pangka lansek,
Tasisik di baliak lantai,
Lah dibilang sado nan dapek,
Nan tingga untuak rang nan pandai.
Catatan : Istilah asal-usul Namo tompek (lokasi) dalam wilayah Nagari Tamparungo yang perlu didalami;
Tanjuang lobuah, Sawah salupak, Gunuang tombuak, Bukik kuniang kaki, Guak puyuah, Batu tagolek, Batu Peti, Siamang lalok, Guak pondam, Ngalau pokak, Gunuang Yutang, Si Gunjo, Pongkaan, Simaru, Sabiluru, Karongkong uso, Ngalau Komik, dan Siparok.
#GP | Sijunjung | 17 September 2022
Tidak ada komentar:
Posting Komentar